坊間好食既芋絲糕已經買少見少，大蕃薯有兩、三年無食過有靈魂既芋絲糕啦。原本山上面果間酒樓整得唔錯，可惜上年換咗配方；屋企附近既素食店又整得一般，粉多芋少......
利香茶居位於上環街市二樓熟食中心，大蕃薯早已聽聞呢個熟食中心好多寶物，幾日前先去巡視一圈。去到利香茶居大概早上十一點，見到冇人坐喺度，老闆同師傅又整緊點心，諗住佢未開門做生意......
大蕃薯：老闆，請問幾點開檔？
老闆（定伙計？）：三點。
大蕃薯：（心中默想）哦？下朝三點？
老闆（好似聽到大蕃薯心裡面諗乜嘢）：喺凌晨三點。點解咁問呢？
大蕃薯：小妹喺附近番工，想問朝早可唔可以嚟飲早茶。
老闆：梗喺得啦。唔好見冇人坐喺度，我哋開緊架。
大蕃薯：小妹食素，請問有冇素食點心呢？
老闆：哦，食素架，我哋有芋絲糕、齋腸粉、奶皇包、馬拉糕。
依家已經好少茶樓會開咁早。芋絲糕、齋腸粉都喺無蛋無奶，奶皇包、馬拉糕就與大蕃薯無緣啦。
今朝特登早一個鐘出門去利香茶居飲早茶，老闆居然認得大蕃薯！！佢記得大蕃薯食素！
（隔離枱既公公婆婆都好奇咁望住大蕃薯，次次一個人去飲茶都會惹來注目。）
開茶之後，大蕃薯點咗一客芋絲糕，一見到賣相已經好感動......搵咗幾年終於又見到有一條條粗芋絲既芋絲糕。芋絲糕煎得非常香口，邊邊既芋絲脆卜卜，有啲似炸芋條。
除咗食味味道之外，大蕃薯頗睇重師傅／廚師既熱誠同心思。整嘢食喺一門藝術，同音樂、舞蹈、繪畫一樣，可以感染身邊既人。藝術雖然喺無固定標準，但喺藝術家有無熱誠、投唔投入、鐘唔鐘意佢自己既作品，呢Ｄ都喺觀眾可以感受到既素質，正如我哋去睇陳奕迅演唱會既時候，會聽得出佢真喺好鐘意唱歌一樣。呢件芋絲糕雖然未去到有團雄雄烈火，但喺食得出師傅既熱誠同專注，呢位師傅對做點心喺有要求既，唔會求祈整，亦都食得出佢既個人風格。好味既食物並唔難搵，但喺要搵到一份有靈魂既食物，就要些少緣份、些少觸角。